Istorgia da la collecziun

L'onn 1900 ha l'uniun grischuna d'art cumenzà a rimnar ina collecziun d'art. Daditg èsi dentant l'incumbensa da la fundaziun "collecziun grischuna d'art" d'acquistar cun cleras finamiras ovras per il museum d'art dal Grischun, e quai per augmentar commensuradamain ils effectivs. La collecziun cumpiglia en il fratemp circa 8000 lavurs da tut ils geners da l'art figurativ e s'extenda da la perioda a partir dal 18avel tschientaner fin al di dad oz. Ina pitschna part dals effectivs è exponida permanentamain sin trais plans da la villa Planta. Quai èn cunzunt ovras d'artistas e d'artists grischuns u svizzers. Cun gruppas d'ovras cumplessivas èn represchentads Angelika Kauffmann, Giovanni Segantini, Augusto Giacometti, Giovanni Giacometti, Alberto Giacometti, Ferdinand Hodler, Ernst Ludwig Kirchner, ils represchentants da la gruppa «Rot-Blau» ed artistas ed artists grischuns contemporans sco Matias Spescha, Not Vital, HR Giger, Pascale Wiedemann u Jules Spinatsch. Ina plazza fixa en la preschentaziun da la collecziun ha er l'art cun medias che cuntegna installaziuns da video da Zilla Leutenegger u da Gabriela Gerber/Lukas Bardill.

En l'edifizi annex (edifizi da Sulser) han lieu annualmain circa tschintg exposiziuns. Ultra d'exposiziuns tematicas e da vistas d'art istoricas e modernas dal Grischun datti adina puspè preschentaziuns, exposiziuns en gruppas e retrospectivas d'artistas e d'artists svizzers e grischuns ed en intervals irregulars er exposiziuns d'art contemporan internaziunal.