Novitad

Not Vital (1949)

Museum for 1 Picabia, 2009
Gip, plastic, 230 x 100 x 70 cm
Museum d'art dal Grischun, Cuira
(cun ina contribuziun da la fundaziun Willy Reber)

En Brasilia ha Not Vital creà ina retscha da dissegns, en ils quals el è sa confruntà explicitamain cun l'architectura: Ina tematica evidenta per l'artist, perquai ch'el na construescha inqual edifizi abstrus betg mo en ses Parkin Not dal Mot a Sent, mabain er ad Agadez u en Patagonia. Questas construcziuns oscilleschan tranter object e sculptura, tranter architectura e monument. In da quests dissegns a rispli fatgs cun facilitad, sin il qual Vital ha collà pitschens cuntels da plastic, è vegnì transferì en la tridimensiunalitad d'ina sculptura: Museum for 1 Picabia. Cun questa ovra fa Not Vital a medem temp la proposta da construir in museum che chaschuna circa ils medems custs sco l'unica ovra d'art ch'el cuntegna, en quest cas la pictura Cure-dents da 1923/25 da Francis Picabia (1879-1953), la quala sa chatta en la chasa d'art da Turitg.

Not Vital è stà fascinà dal raquint che Picabia haja incumbensà ses manaschunz da cumprar chaussas da la vita quotidiana a Paris. Questas chaussas banalas – tgiradents, bavrolas ed ina corda – ha Picabia mess sin in purtader da maletgs ed ha creà ina magnfica natira morta da fluras. Chaussas sumegliantas da la vita quotidiana, sco per exempel ils pitschens cuntels da plastic, ha er Not Vital cumprà en Brasilia. En China, nua che l'artist ha dapi curt temp in atelier da sculptura, ha el transferì il dissegn en ina sculptura da gip expressiva e surdimensiunada ed ha collà sin quella plirs cuntels da plastic. Quests cuntels cumparan dentant en ina scala engrondida considerablamain ed en ina dimensiun irritanta visavi ils urdains da plastic originals. Questa sculptura engrondida ha pudì vegnir fatga mo en China, perquai ch'ella è vegnida culada a maun.

Not Vital po s'imaginar che sia idea d'in museum – ina construcziun, in'ovra d'art – pudess vegnir realisada er per auters chaus d'ovra, per exempel per la sculptura da gip Buste de Silvio dad Alberto Giacometti: Mintga giada ch'el visita il museum d'art dal Grischun, pensa el che questa plastica excellenta fiss degna d'in agen museum.

Beat Stutzer