Highlights da la collecziun

Ditg èn las Alps vegnidas represchentadas a moda patetica e surelevada u da maniera idillica e seraina, pli tard er fitg natiralistica. Il maletg da Ferdinand Hodler (1853-1918) «Genfersee mit Savoyerbergen» rumpa questa tradiziun. El è marcà d'ina frontalitad rigurusa senza in effect da profunditad graduà e sa caracterisescha tras ina represchentaziun planiva e nunsentimentala. Detagls e rinviaments a la civilisaziun mancan dal tuttafatg. La paletta da las colurs è discreta e fraida, ed il maletg sa cumpona la finala mo da quatter bindels orizontals da colur blau verda. Il caracter sever ed abstract da questa cuntrada duai mussar la natira sco insatge monumental ed etern.

Giovanni Segantini (1858–1899) vala sco renovatur da la pictura da las Alps. El ha superà la sureleva­ziun patetica e la transfiguraziun idealistica da la natira en l'art. Segantini, d'origin talian, è immigrà l'onn 1886 en il Grischun, ha vivì l'emprim a Savognin ed alura a Malögia. Il mund alpin cun sia glisch intensiva ha sveglià en el ina nova enclegientscha per la pictura. El ha mess las colurs puras cun penelladas finas e pastusas en moda parallela ed uschè stretga ina sper l'autra che las singulas colurs s'uneschan a colurs maschadadas pir en ils egls da la con­templadra u dal contemplader (divisiunissem). Ultra da quai vala el sco in dals simbolists dominants dal Fin-de-siècle.

Ils purtrets d'Alberto Giacometti (1901-1966) sa caracteriseschan tras l'inscunter direct cun l'uman e tras la represchentaziun intensiva da la persunalitad dals purtretads. Suenter lungs studis preliminars da dissegn ed emprovas da modellar chatta Alberto Giacometti ils onns 1950 in stil plastic che planivescha las figuras en il profil e stenda ellas en l'autezza. Sin fundament da quai e da la surfatscha structurada vegn l'egliada dal contemplader drizzada adina puspè vers la part dals egls furmada intensivamain, la quala revela l'intern da la sculptura. Model stevan per el tranter auter savens ses frar Diego, ses amis da Paris e sia dunna Annette.

Albert Müller (1897-1926), in represchentant da la gruppa «Rot-Blau» mussa sia dunna Anna Hübscher sco praschuniera: la structura dal maletg, accentuada cun diagonalas, creescha in giatter steri che restrenscha ses corp. Las fermas colurs - surtut blau, cotschen ed il verd cumplementar - e las furmas angularas en piz cumpletteschan quest ambient malempernaivel ed èn il spievel dal stadi da sanadad intern, depressiv da la dunna. Er la fanestra a dretga na mussa betg la vista en in meglier avegnir. La tschera vida ed introvertida, ils mauns plegads sin la schanuglia laschan sminar che Anna ha capitulà davant ses destin. Albert Müller ha picturà sia dunna, ch'era da quel temp gia fitg spussada, senza in segn da sentimentalitad - ella è morta da tifus il 1927, curt suenter Müller sez.

Sco represchentant il pli impurtant da la figuraziun fantastica ha HR Giger (*1940) occupà fin mez ils onns 1970 ina da las posiziuns las pli nunconformisticas da l'art svizzer. El tematise­scha traumas da naschientscha e temas claustrofobicas, fatgs erotics, dentant er la tortura e la mort cun ina precisiun objectiva e naturalistica en moda monocromatica. Cun objects dal mintgadi sco ina bognera ordinaria evochescha Giger la sgarschur. Da l'autra vart ha el vesì en l'activitad da la glieud che allontanescha il rument in «act mecanic-erotic». Cun isolar il subject e cun drizzar il focus sin l'abiss sul stgaffescha el visiuns da dischariel.

Pascale Wiedemann (*1966) sa serva da sia vestgadira preferida ch'ella cula en rascha artifiziala per reflectar sasezza cun ironia e finezza. L'autopurtret tradiziunal è ina reproducziun figurativa da l'artista - Pascale Wiedemann percunter prenda si'atgna vestgadira per sa caracterisar. La vestgadira è sco ina segunda pel e colliada stretgamain cun l'activitad e la natira da la persuna. Ella è l'expressiun da l'identitad e spievla il stadi persunal e la creativitad. Il t-shirt e la rassa han in'istorgia che correspunda a l'istorgia da la purtadra e che vegn documentada e sigillada cun quità en la lavur cun il titel «Selbstportrait».

En la seria Delete da Zilla Leutenegger (*1968) vesan ins pitschnas dunninas che fan lur lavur da mintgadi: pulir, far cun il tschitschapulvra, far or cun il fier e, tar «Delete 5» che sa chatta al museum d'art dal Grischun, batter ponns. La pitschna figura feminina diligenta ha l'aspect d'in dissegn animà, sa basa dentant sin ina sequenza da video ch'è vegnida elavurada cor­respun­dentamain. I para ch'il batter nuninterrut da la figura projectada fetschia crudar la colur rosa giu da la paraid d'exposiziun. Il rudè alv e net è pia l'interfatscha d'ina colliaziun attractiva dal spazi real e dal maletg immaterial.