Archiv Exposiziuns 2012

LOS
Vaclav Pozarek. Library of Sculpture

Museum d'art dal Grischun, Cuira, ils 18 da favrer fin ils 6 da matg 2012

La Villa Planta, nua che sa chatta oz il museum d'art dal Grischun, è vegnida construida oriundamain sco chasa d'abitar privata. Partind da l'utilisaziun oriunda da questa chasa, ha il museum d'art dal Grischun envidà l'artist Vaclav Pozarek che viva a Berna d'installar qua ses project d'art "Library of Sculpture" (LOS) e da determinar da nov il caracter anteriuramain privat da las stanzas, e quai cun agid da sia collecziun persunala davart l'istorgia da la sculptura.

L'artist ch'è naschì l'onn 1940 è daventà enconuschent cunzunt tras sia ovra sculpturala. Quella cumbinescha elements constructivistics e conceptuals cun in sistem da referenza che schlia si en moda divertenta la logica e sistematica memia severa. Main enconuschent è ses grond archiv davart la sculptura che datescha da l'antica fin al temp dad oz. Quest archiv stat en il center da l'exposiziun e vegn preschentà per l'emprima giada en il museum d'art dal Grischun. Durant blers onns ha Vaclav Pozarek rimnà e furmà questa collecziun voluminusa. Ella na metta betg mo ses agen art en in rom pli grond, mabain avra in vair museum imaginar da la sculptura.

Per la "Library of Sculpture" installescha Vaclav Pozarek ina gronda biblioteca cun tut ils indrizs che tutgan tiers en l'emprim plaun da la Villa Planta. Sias mobiglias sculpturalas furman ina installaziun tridimensiunala. Sin curunas, maisas, pults e sochels preschenta l'artist sia collecziun da cudeschs e da fotografias. A medem temp mussa el atgnas lavurs da quest context sco er models e dissegns d'ina instituziun fictiva ch'è deditgada dal tuttafatg a la sculptura. En quels sa manifestescha in concept da sculptura cumplessiv che unescha posiziuns e linguas d'expressiun cuntradictoricas. Quest concept cuntrafa pia a la moderna cun sias disposiziuns e valurs cleras e l'oppona in sistem da referenza avert.

Per l'exposiziun cumpara in cudesch cun numerus chaus caracteristics da l'istorgia da la sculptura – or da l'optica subjectiva radicala da Vaclav Pozarek. In supplement cun maletgs ed essais documentescha ils connexs da sia biblioteca d'artist singulara. 

                                                                                       Stephan Kunz

A medem temp:

La collecziun vegn pendida si da nov
La collecziun dal museum d'art dal Grischun cumpiglia ovras da tut ils secturs da l'art figurativ dal 18. tschientaner fin al temp dad oz, oravant tut lavurs d'artistas e d'artists dal Grischun sco er d'artistas e d'artists internaziunals che han in connex cun il Grischun. A chaschun da l'installaziun da la "Library of Sculpture" en la Villa Planta vegn la collecziun pendida si da nov. Ensemen cun acquisiziuns novas vegn preschentada ina selecziun represchentativa da la collecziun. 

Entretschaments. Dissegns or da la collecziun
Partind dal sboz per ina tessaria dad Ernst Ludwig Kirchner che sa numna La vita ("Das Leben") mussa il museum d'art dal Grischun per l'emprima giada in dumber pli grond da dissegns e da lavurs sin palpiri da si'atgna collecziun e collia uschia ovras da differents temps e temas da differents connexs (da la vita).

Vernissascha
venderdi, ils 17 da favrer, a las 18.00 

Publicaziun
LOS. Vaclav Pozarek. Library of Sculpture, cun texts da Stephan Kunz e da Max Wechsler, Turitg: Scheidegger & Spiess, 128 paginas, ca. 85 illustraziuns, 48.- francs / 40.- francs per commembras e commembers da l'UGA.

Visitas guidadas publicas da la "Library of Sculpture"
las gievgias, ils 23 da favrer, ils 8 da mars, ils 29 da mars, ils 19 d'avrigl, ils 26 d'avrigl ed ils 3 da matg, mintgamai a las 18.00

Retscha da referats en il rom da l'exposiziun "Library of Sculpture"
en collavuraziun cun la biblioteca chantunala dal Grischun

gievgia, ils 8 da mars, a las 19.00: Jan-Andrea Bernhard: Bibliotecas en chasas patrizianas dal Grischun: med da represchentaziun da l'aristocrazia u med da lavur da scienziads?

gievgia, ils 15 da mars, a las 19.00: Dorothée Bauerle-Willert: La biblioteca dad Aby Warburg: in laboratori da l'istorgia culturala dal maletg

gievgia, ils 19 d'avrigl, a las 19.00: Iso Camartin: La biblioteca da Babel. Ils cudeschs reals ed imaginars da Jorge Luis Borges

gievgia, ils 26 d'avrigl, a las 19.00: Max Wechsler: Il museum John Soane a Londra

gievgia, ils 3 da matg, a las 19.00: Susanne Bieri: Sa deditgà a l'archiv artistic: «… Darin alles was sonst mit Worthen gegeben auch den Augen vorgestellet wird»

Ateliers per uffants en la "Library of Sculpture"

Atelier I per uffants da 6 fin 8 onns, ils 2 da matg, da las 14.00 fin las 16.00
Atelier II per uffants da 9 fin 12 onns, ils 9 da matg, da las 14.00 fin las 16.00
Atelier rumantsch, ils 23 da matg, da las 14.00 fin las 16.00

Ateliers per uffants "Entretschaments. Dissegns or da la collecziun"

Atelier I per uffants da 6 fin 8 onns, ils 14 da mars, da las 14.00 fin las 16.00         
Atelier II per uffants da 9 fin 12 onns, ils 28 da mars, da las 14.00 fin las 16.00
Atelier rumantsch, ils 4 d'avrigl, da las 14.00 fin las 16.00

Introducziun per persunas d'instrucziun en omaduas exposiziuns
ils 7 da mars, da las 17.00 fin las 19.00, annunzia necessaria

Cun il sustegn da la fundaziun Boner per art e cultura