Archiv Exposiziuns 2009

Muments schelads. Ils maletgs da trapla da Daniel Spoerri en il dialog cun Judith Albert, cun David Claerbout, cun Caro Niederer, cun Beat Streuli e cun Jeff Wall

Museum d'art dal Grischun, Cuira, dals 27 da zercladur fin ils 13 da settember 2009
Ils maletgs da trapla da Daniel Spoerri dateschan dals onns 1960 ed èn capodovras da l'istorgia d'art. La relevanza da questas ovras temprivas da l'artist che ha oz prest 80 onns na sa mussa betg mo or da la distanza da l'istorgia d'art. Er en ina cumparegliaziun directa cun ovras d'ina generaziun pli giuvna han ellas in effect actual ed imminent. Il "mintgadi" gioga ina rolla centrala en quest dialog tranter l'artist pli vegl e las artistas ed ils artists pli giuvens Judith Albert, David Claerbout, Caro Niederer, Beat Streuli e Jeff Wall – dentant betg mo tras l'utilisaziun da chaussas e da motivs dal mintgadi, mabain er tras la reflexiun davart il temp, la quala resulta cun s'occupar dal mintgadi.

Cun colla u cun rascha artifiziala fixescha Spoerri sin il plat d'ina maisa situaziuns ch'el ha chattà casualmain – rests da mangiativas, vaschella ed auters objects – e penda quai sco ina natira morta vi da la paraid. Ils uschenumnads maletgs da trapla u "tableaux-piège" tschiffan in tschert mument e mantegnan quel. Distatgar in mument or da la casualitad dal mintgadi po esser ubain ina marventada u in'extensiun da quest mument, po descriver tant ina fixaziun sco er in moviment infinit e po signifitgar tant la perpetnadad sco er la caducitad.

David Claerbout per exempel extenda en sia installaziun da video cumplexa (Sections of a Happy Moment, 2007) in unic mument fotografic a 26 minutas. Durant quest temp vegn la medema famiglia giuganta adina puspè mussada or d'ina autra perspectiva. Beat Streuli percunter fotografescha – or d'ina suletta optica – adina puspè novas passantas e novs passants che vegnan sperasor casualmain. Sco Claerbout mussa el questas fotografias or da la retscha Porte de Ninove (2007) en ina sequenza filmica projectada. Questa seria casuala d'umans anonims chaschuna in sentiment da durada infinita, sumegliant al video da Judith Albert. En Zwischen der Zeit (2004) derscha ina figura feminina, ch'è vesaivla mo per part, latg or d'ina cria en ina cuppa. L'acziun da mintgadi, che Spoerri interrumpa sapientivamain cun fixar ils objects, cuntinuescha permanentamain tar Albert. En in loop infinit raffinà cula il latg or da la cria. Er en la fotografia da format grond An Octopus (1990) da Jeff Wall stat la maisa – sco tar Albert e tar Spoerri – en il center da l'acziun. En ina stanza che
sumeglia in tschaler giascha in octopus sin ina veglia maisa da lain. Quai che para dad esser ina fotografia documentara casuala, è en realitad ina inscenaziun da requisits ch'è illuminada conscienziusamain. Er Caro Niederer sa fatschenta cun chaussas dal mintgadi ch'ella interpretescha da nov sco chaussas preziusas. Ella lascha nuar fotografias spontanas en China a tarpuns da saida gigantics. Tras quai ch'il temp e ch'il cuntegn vegnan distanziads dal context privat (la realisaziun dals tarpuns tras lavurantas estras dura nov mais), survegnan las chaussas persunalas da Niederer ina valur generala e daventan parablas dal mintgadi e da la vita sco tala. Uschia n'èsi er tar Spoerri betg tant la caducitad dals rests da mangiativas e dals ruments che transfurma ses maletgs da trapla en in memento mori, mabain il distatgament demonstrativ or dal ciclus perpeten da la vita. Quai che collia l'ovra da Spoerri cun las lavurs d'ina generaziun pli giuvna, che vegnan mussadas qua, è la cuntraversa cun la casualitad e cun l'intenziun, cun il moviment e cun la stagnaziun, cun il mintgadi e cun la perpetnadad. L'exposiziun Muments schelads e la tematica fundamentala da la durada, che sa manifestescha en moda differenta en mintgin dals exponats, sa basa sin la dumonda vegliandra, ma adina actuala, co che l'uman percepescha il temp e sia spiraziun.

Katharina Ammann

Visitas guidadas publicas
las gievgias, ils 2, ils 16, ils 30 da fanadur, ils 6, ils 13, ils 20 d'avust, ils 3 da settember, mintgamai a las 12.30

Atelier per uffants "Fixar – inscenar"
ils 26 d'avust (6 fin 8 onns), ils 2 da settember (9 fin 12 onns), mintgamai da las 14.00 fin a las 16.00
atelier rumantsch, ils 9 da settember, da las 14.00 fin a las 16.00

Discurs d'art
venderdi, ils 11 da settember, a las 18.15
Katharina Ammann e Beat Stutzer discurran cun las artistas Judith Albert e Caro Niederer

Moviments
sonda, ils 12 da settember, a las 19.30
in concert da la filarmonia da chombra dal Grischun cun ovras da Marti, da Kelterborn, da Brähm e da Kopetzki
entrada CHF 25.– (CHF 20.– per commembras e per commembers da la UGA)

Publicaziun
Muments schelads – Ils maletgs da trapla da Daniel Spoerri en il dialog cun Judith Albert, cun David Claerbout, cun Caro Niederer, cun Beat Streuli e cun Jeff Wall, ediziun dal museum d'art dal Grischun Cuira, cun texts da Katharina Ammann, da Nicole Seeberger e da Beat Stutzer, chasa editura Kehrer, Heidelberg, broschura, ca. 20 x 24 cm, ca. 72 paginas, ca. 35 illustraziuns en colur, CHF 35.– (CHF 28.– per commembras e per  commembers da l'uniun grischuna d'art)

L'exposiziun Muments schelads vegn sustegnida da:

• fundaziun Ars Rhenia per la promoziun surregiunala d'art e da cultura
• fundaziun per la cultura Landis & Gyr, Zug

Tapissarias dad Ernst Ludwig Kirchner e da Lise Gujer: sbozs e models nunenconuschents

Museum d'art dal Grischun, Cuira, dals 7 da favrer fin ils 22 da mars 2009
Per l'emprima giada vegnan exponids ils sbozs remartgabels ed en blers reguards fascinants che Ernst Ludwig Kirchner (1880–1938) aveva preparà per tapissarias e per tessarias che Lise Gujer (1893–1967) ha realisà sin il taler anc durant la vita da l'artist u suenter sia mort. La gronda part da quests sbozs n'èn betg vegnids publitgads e n'èn anc mai vegnids preschentads.

Curt avant sia mort ha Lise Gujer surdà al museum retic in pachet sigillà ch'ella ha permess dad avrir pir suenter trenta onns, bain per evitar imitaziuns da sia atgna lavur. Suenter la scadenza da quest termin èsi sa mussà l'onn 1998 ch'il pachetcuntegneva numerusas skizzas e numerus sbozs da Kirchner per tessarias. L'urdenè vegnì transferì sco donaziun al museum d'art dal Grischun, per ch'el possia vegnirsegirà, tegnì en salv e restaurà professiunalmain. Cun quests sbozs posseda ilmuseum d'art dal Grischun a Cuira in urden visualmain impressiunant e fitgsignificativ per l'istorgia d'art che cumpiglia passa 50 sbozs e skizzas. Suenter chelas lavurs èn vegnidas restauradas cun pazienzia e cun premura, pon numerus feglsche sa chattavan en in stadi desolat vegnir preschentads ussa a la publicitad.

L'exposiziun mussa quests sbozs che sa cumponan savens da pliras parts e cheimpressiuneschan tras lur preschientscha particulara e tras lur ritgezza visuala. Ilssbozs ed ils models ch'èn per part monumentals, ma che paran – pervia da lurcumposiziun materiala – d'esser filigrans, s'expriman cun in agen linguatg pictural.Surpassond per bler lur funcziun da model oriunda pon per l'ina ils dissegns plats,per part colurads, per l'autra ils objects da mixed-media plastics, mintgatanttridimensiunals e per finir las tapissarias ch'èn vegnidas realisadas, bunamain samanifestar sco ovras d'art individualas. Per illustrar en il dialog tranter il model e latessaria tant las concordanzas sco er las dissonanzas vegnan ils sbozsaccumpagnads en intgins lieus impurtants da las tapissarias che Lise Gujer ha realisà.

Beat Stutzer

Visitas guidadas publicas
Las gievgias, ils 12 ed ils 26 da favrer, ils 12 da mars, mintgamai a las 12.30.

Publicaziun
Tapissarias dad Ernst Ludwig Kirchner e da Lise Gujer. Ein Werkkatalog derEntwürfe, edì da Beat Stutzer, cun contribuziuns da Mechthild Flury-Lemberg,Eberhard W. Kornfeld, Kristina Liedtke e da Beat Stutzer, Scrittiras tar la collecziungrischuna d'art 3, lià cun cuverta, 120 paginas, 156 illustraziuns, 49.– francs / 30.–francs per commembers (-bras) da la UGA.