Actual

Museum d'art dal Grischun a Cuira, dals 26 da matg fin ils 26 d'avust 2012

André Thomkins è in dals artists svizzers ils pli multifars dal 20. tschientaner. Tar sias invenziuns las pli originalas tutgan ils lackskins: ina pictura cun colur liquida sin aua. Il museum d'art dal Grischun deditgescha a questa gruppa d'ovras grondiusa in'exposiziun cumplessiva e permetta uschia in nov access a questa ovra fascinanta.

André Thomkins (1930-1985) è enconuschent sco dissegnader excellent e sco verbalist. Sco nagin auter ha el dumagnà ils meds illustrativs classics, a medem temp ha el er experimentà cun differentas tecnicas e cun differents materials. Ils onns 1950 ha el sviluppà uschia ses "lackskins". El ha picturà e dissegnà cun lac sin aua ed ha producì en questa moda maletgs d'in immens effect imaginativ. Il lac croda sco gut u cula sco fil sin l'aua e furma ina pel che sa mida cuntinuadamain e che po vegnir manipulada il medem mument. Ad in tschert punct ha Thomkins fixà il moviment cun trair giu sin palpiri il maletg che noda. Uschia èn ils lackskins maletgs ch'èn vegnids creads tant casualmain sco er tras l'intervenziun da l'artist. Els pretendan da l'artist sco er da l'aspectatura e da l'aspectatur pazienza e la prontezza da s'occupar cun la disposiziun dals materials da sa midar e da scuvrir en quai in mund plain maletgs.

Cun ses lackskins ha André Thomkins surpiglià tecnicas veglias per far palpiri da marmel e las ha extendidas. Il medem mument ha el chattà atgnas vias en la culminaziun da la pictura abstracta ed ha creà colliaziuns a discussiuns da l'avantgarde artistica da ses temp. L'exposiziun mussa per l'emprima giada en moda cumplessiva questa gruppa d'ovras grondiusa che manifestescha surprendentamain bleras fassettas da l'art dad André Thomkins e permetta in nov access a questa ovra fascinanta. «Vesì dal puntg da vista geografic», ha ditg André Thomkins, «han ils lackskins il gust dal pajais da la cucagna, nua ch'i culan latg e mel ...».

L'exposiziun vegn realisada en collavuraziun cun il relasch da l'artist en il museum d'art dal Liechtenstein, nua ch'i vegn preparada ina gronda retrospectiva da Thomkins per l'onn 2013.

Stephan Kunz, directur dal museum d'art dal Grischun

Vernissascha
venderdi, ils 24 da matg 2012, a las 18.00
Bainvegni ed introducziun: Stephan Kunz, directur dal museum d'art dal Grischun

Catalog
André Thomkins. Lackskins, edì da Stephan Kunz e Dagmar Streckel, cun ina introducziun da Stephan Kunz e cun texts dad André Thomkins, Daniel Spoerri e Carlheinnz Caspari, Scheidegger & Spiess, 2012, 160 paginas, ca. 110 illustraziuns en colur, CHF 35.– / CHF 30.– per commembras / commembers da la UGA.

Guids publics
las gievgias, ils 31 da matg, ils 7 da zercladur (suenter il guid datti in concert), ils 14 da zercladur (suenter il guid datti in concert), ils 12 da fanadur, ils 16 d'avust, ils 23 d'avust, mintgamai a las 18.00

Lingua e musica – occurrenzas spezialas en il rom da l'exposiziun dad André Thomkins
gievgia, ils 7 da zercladur, a las 19.00
Palindroms e Trümpi, prelecziun e concert da e cun ANTON BRUHIN

gievgia, ils 14 da zercladur, a las 19.00
prelecziun e concert da e cun EDU HAUBENSAK
Il tschiel blau (poesias)
Trais tamburs gronds (cumposiziun per trais paucas e per divers instruments da percussiun). Martin Lorenz, battaria

Ateliers per uffants
ATELIER I: per uffants da 6 fin 8 onns, ils 6 da zercladur, da las 14.00 fin las 16.00
ATELIER II: per uffants da 9 fin 12 onns, ils 20 da zercladur, da las 14.00 fin las 16.00
ATELIER RUMANTSCH: ils 27 da zercladur, da las 14.00 fin las 16.00.

Introducziun per persunas d'instrucziun
ils 6 da zercladur, da las 17.00 fin las 19.00, annunzia necessaria