Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

​​stgalim superiur​

DISCURS D'ART E LAVURATORIS

ACTUAL
Erica Pedretti. Estra avunda. En ina preschentaziun da Katalin Deér e da Lukas Furrer
22-2 Fin 7-7-2020
Figuras da fildarom pendentas, alas surdimensiunadas da stoffa u da latex u sculpturas d’arschiglia e da fier sco er dissegns filigrans: Las ovras da la scriptura ed artista Erica Pedretti mussan in equiliber labil e fraschladad. En il discurs d’art vegn sclerida – tras exercizis e cun pleds – la dumonda da la poesia che stat davos las ovras. En il lavuratori – cun ina part creativa – vegnan furmads objects inspirads da pleds.

Evelina Cajacob. sautar autramain
21-03 Fin 07-06-2020
Evelina Cajacob integrescha en sias lavurs las medias ed ils geners ils pli differents. Tras quels sondescha ella ils puncts da contact tranter il moviment, la repetiziune la densificaziun. In element gioga qua adina puspè ina rolla centrala: la lingia. Ella sa tira – en il vair senn dal pled – sco in fil cotschen tras l’ovra dad Evelina Cajacob. En il discurs d’art suandain nus – tras exercizis cun il corp – la lingia ed empruvain da scuvrir uschia il tema dal moviment. En il lavuratori vegnan creads maletgs da lingias cun differents meds e cun differents materials.

COLLECZIUN
TGE COLUR HA IL TSCHIEL?
Dumonda simpla: natiralmain blau! Ma èsi propi uschia? A maun da contemplaziuns da maletgs empruvain nus da respunder questa dumonda e rimnain «colurs dal tschiel» ch'ans dattan l'inspiraziun per in agen maletg dal tschiel en l'atelier.

L'ISTORGIA DAL MUSEUM 
Ina visita guidada ludica ed interactiva tras la Villa Planta e l'edifizi nov avischina las scolaras ed ils scolars a l'architectura. Tge istorgias sa zuppan davos ils edifizis? Co è la Villa Planta daventada in museum? Co è sa midada l'architectura dal museum en il decurs dals onns?  Co stattan la Villa Planta e l'edifizi nov dals architects Barozzi/Veiga da Barcelona architectonicamain en in dialog?

LA FAMIGLIA GIACOMETTI
Las scolaras ed ils scolars emprendan d'enconuscher la dinastia d'artists dals Giacometti dal vitg bregagliot Stampa. Davant ils maletgs, las sculpturas e l'artisanadi vegn sclerida l'influenza da la cuntrada e vegni dumandà, co che quella è vegnida concepida en moda artisticamain differenta dals artists respectivs. 

TGI SUN JAU? 
En il center stat la contemplaziun da purtrets e d'autopurtrets. Partind da quai analisain nus, co ch'ina artista u in artist exprima ses caracter e sia identitad en in'ovra cun agid da penelladas e da colurs. Las observaziuns vegnan applitgadas suenter en l'atelier cun far in autopurtret. 

Per il stgalim superiur vegn la visita dal museum purschida sco discurs d'art u sco lavuratori. En l'exposiziun examineschan las scolaras ed ils scolars en il discurs ed en pitschnas activitads artisticas ovras, tecnicas, artistas ed artists sco er il lieu, il museum. Questas enconuschientschas pon vegnir approfundadas cun incumbensas e lavurs da project artisticas en il lavuratori che ha lieu en l'atelier dal museum. Las scolaras ed ils scolars emprendan d'enconuscher il museum, sias incumbensas e sia art e scuvran il lieu en moda captivanta ed inspiranta.

Fixar in termin ordavant

Durada dal discurs d'art: 90 minutas
Durada dal lavuratori:
120 minutas
Custs per scolas primaras chantunalas:
gratuit
Custs per scolas primaras or da chantun:
discurs d'art CHF 150.00 (incl. entrada), lavuratori CHF 200.00 (incl. entrada)

PDF Urden da chasa per classas

PDF Indemnisaziun da viadi per classas

Annunzia
PDF
Formular d'annunzia per classas

Infurmaziun
kunstvermittlung@bkm.gr.ch
T +41 81 257 28 72

 
Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00