Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Prevista

​Ludovica Carbotta. Ils Telamons
21.03.-02.08.2020

Cun sia preschentaziun en il museum d’art dal Grischun salva Ludovica Carbotta (*1982, IT) sia emprima exposiziun individuala en Svizra.
L’artista taliana sa lascha inspirar da las ovras da la dinastia dals Giacomettis e sviluppa ina nova gruppa da sculpturas, che sa referescha al concept da la famiglia. A mintga sculptura attribuescha ella in’atgna vegliadetgna cun elavurar differents scenaris e differentas interpretaziuns d’ina sculptura sumeglianta. Igl è lev da s’imaginar ina sculptura che correspunda ad ina persuna pli veglia. Ma co vesa ora ina sculptura che correspunda ad ina persuna giuvna u ad in uffant? Ludovica Carbotta sa lascha manar da sia atgna memoria e creescha sculpturas che communitgeschan ina cun l’autra tras il diever da segns e d’ornaments. Sco sche l’artista dess ina furma fisica al temp, stattan – en l’exposiziun – in sper l’auter sco commembers da la medema famiglia il preschent, il futur ed il passà. Sche Ludovica Carbotta sa basa plinavant sin il citat da Jorge Luis Borges «Spievels e paregliaziuns èn senza misericordia, perquai ch’els augmentan il dumber d’umans», metta ella en dumonda la famiglia sco furma da relaziun desiderabla, analisescha la rolla da la famiglia en la societad e metta la famiglia en relaziun cun aspects sco identitad u autodeterminaziun.
Sco in passà pers vegn plazzada – parallelamain a l’exposiziun en il museum d’art dal Grischun – ina sculptura en la natira per surpassar en questa moda il rom da la preschentaziun. Sco part da l’exposiziun lain nus ans metter sin via per chattar la sculptura messa a l’abandun e per la manar enavos en il ravugl da la famiglia.
Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00