Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2019

​​Andriu Deplazes. Egls Cotschens
Premi d'art Manor cuira 2019​​

En il rom dal premi d'art Manor ha Andriu Deplazes (*1993, Turitg) realisà sia exposiziun individuala fin ussa la pli cumplessiva. Ultra da ses maletgs en ieli mussa el per l'emprima giada ovras sin palpiri. La promoziun impurtanta survegn in artist giuven che preschenta – sco observatur attent da noss temp – in'ovra fitg autentica da pictura e da dissegn.

En l'aivradad da las colurs psicadelicas da ses maletgs en ieli vesain nus persunas sfiguradas e plantas che sa scuflan. Corps sa manifesteschan sco mantels vids. Fritgs van en mal en guauds che sa derasan. L'artist cun ragischs grischunas sviluppa en ses maletgs in mund da siemi tranter l'apocalipsa ed il paradis. Il resun da las cuntradas inexplitgablas da Peter Doig u da las creatiras florealas surrealisticas da Max Ernst serran ils maletgs dad Andriu Deplazes en ina rait d'associaziuns davart dumondas actualas. 

La sexualitad u il terrorissem èn temas perceptibels cunzunt en ils dissegns. In motiv che sa repeta è l'attentadra da suicidi cun burca e tschinta explosiva. Deplazes la preschenta violenta ed a medem temp vulnerabla e mussa uschia ina cuntradicziun existenziala. Creatiras androginas preschenta l'artist en ina voluptad nunsentenziabla e las permetta da sa perder en quella senza resguardar convenziuns moralas. Malgrà clers motivs sa refusan las ovras ad eveniments reals. Sa reducind a fatgs fragils ed efemers rendan sias lavurs sin palpiri plitgunsch visibels noss maletgs interns profunds. Directamain ed en moda exigenta creeschan els in'atgna realitad che s'effectuescha suror l'ur dal dissegn.

Tar l'exposiziun cumpara – en la chasa editura per l'art modern – in catalog ritgamain illustrà cun contribuziuns da Julie Enckell-Julliard, Damian Jurt e Stephan Kunz.


Uras d'averturaMa-Du 10.00 – 17.00 Gi 10.00 – 20.00