Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2017

​​ANNE LOCH
Paradis artifizials
25.02. - 07.05.2017​
 

Il museum d'art dal Grischun Cuira deditgescha a l'artista tudestga Anne Loch ina retrospectiva cumplessiva. La pictura, ina giada fitg remartgada, è sa retratga durant ils onns 1980 radicalmain da la publicitad. L'exposiziun "Paradis artifizials" mussa ussa per l'emprima giada l'ovra immensa, per gronda part nunenconuschenta, da l'artista ch'è morta l'onn 2014 en la Bregaglia.

L'artista Anne Loch, naschida l'onn 1946 a Minden, ha lavurà – suenter sia scolaziun a la "Kunstakademie Düsseldorf" – durant plirs onns en Italia. Ils onns 1984-1988 ha ella vivì a Cologna ed ha chattà gronda stima sco pictura en in temp da la "fom da maletgs". Galarias impurtantas en Germania ed en Svizra l'han represchentada ed ella è vegnida recepida bain cun sias cuntradas e natiras mortas en il context da la nova pictura ("mussar colur") ed en l'ambient da la "romantica en l'art contemporan".
L'onn 1988 è Anne Loch sa retratga per 14 onns a Tusaun ed ha chattà en il Grischun sia nova patria. La retratga è stada radicala tant envers il manaschi d'art sco er envers ils novs conturns, en ils quals ins na l'ha strusch percepida. Secretamain ha ella lavurà vinavant instancablamain e stgaffì in'ovra voluminusa. La confruntaziun cun la natira, il maletg da la cuntrada en la pictura, il paradis artifizial en sia bellezza delicata, l'ha occupada er vinavant.
L'onn 2002 è Anne Loch turnada en Germania ed ha vivì intgins onns a Duisburg ed ad Essen. Ella ha lavurà vinavant vi da gruppas d'ovras ch'ella aveva cumenzà en Svizra ed ha stgaffì parallelamain novas lavurs. L'onn 2013 è ella puspè sa chasada en il Grischun, nua ch'ella è morta l'onn 2014 en la Bregaglia suenter ina greva malsogna.
Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00