Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Actualitads

Erica Pedretti. estra avunda
22.02.-07.06.2020
Vegn probablamain prolungada!

En ina preschentaziun da Katalin Déer e da Lukas Furrer

Erica Pedretti è ina persunalitad excepziunala en l’art ed en la litteratura da la Svizra. Ultra da ses success sco scriptura ha ella stgaffì sia atgna ovra sco artista figurativa, in’ovra che po vegnir scuvrida oz da nov. Schebain ch’i sa mussan adina puspè colliaziuns e cruschadas infurmativas tranter maletg e text, metta l’exposiziun en il museum d’art dal Grischun en il center l’ovra da l’art figurativ.
Erica Pedretti è naschida l’onn 1930 a Sternberg (Moravia dal nord/Tschechia). L’onn 1946 è ella sa domiciliada en Svizra. A Turitg è ella sa laschada scolar a l’argientera ed ha creà emprimas ovras temprivas da pitschen format che han anticipà ils objects ligers ed arius da pli tard. Cun ses «objects d’alas» è Erica Pedretti sa preschentada en la publicitad l’emprima giada ils onns 1970 sco artista figurativa ed ha sviluppà or da quai ina gronda famiglia d’objects che sveglian associaziuns ad utschels ed a peschs. Quels ha ella confruntà cun sculpturas che sume glian skelets e che paran dad esser reducidas a l’essenza da l’esser. Parallelamain a quai è sa sviluppada in’ovra da dissegns extremamain fins che accentuescha il caracter intim da questas lavurs.

L‘exposiziun en il Museum d‘art dal Grischun vul dar ina survista represchentativa da l‘operar artistic figurativ dad Erica Pedretti. Ella reunescha lavurs da tut las fasas creativas dapi ils onns 1950, e permetta ina nova scuverta da l‘artista che ans para oz fitg contemporana. Per la preschentaziun en il Museum d‘art dal Grischun han ins pudì engaschar l‘artista Katalin Deér e l‘architect Lukas Furrer. Els han construì in‘atgna structura en il local d‘exposiziun, ed han stgaffì uschia in rom specific per las ovras fragilas. Tras quai sa collia l‘ovra dad Erica Pedretti en moda tut speziala cun il lieu da sia preschentaziun. Il spazi architectonic e l‘ovra figurativa en la choreografia da Katalin Deér entran en in dialog unic. L‘art dad Erica Pedretti pon ins guardar qua en in‘autra moda: «ester avunda» duai el sa preschentar e s‘avrir per ina nova vista.


Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00